Inspirasjon frå folkemusikk, jazz og klassisk

Det kompositoriske uttrykket til Jo Asgeir Lie er inspirert av norsk og svensk folkemusikk, men han hentar også inspirasjon frå jazz og klassisk musikk.

Det er eit stort spenn i produksjonen hans, som inneheld teatermusikk, større og mindre soloverk, kammermusikkverk, korverk og liturgisk musikk.

Han er også ein mykje nytta arrangør, og har arrangert musikk for ei rekkje ensemble.

Studiomusikar og ensemblemusikar

Jo Asgeir Lie har spelt med ei lang rekkje norske musikarar. Han har medverka på plater med artistar som Ole Paus, Stein Torleif Bjella og Jonas Fjeld. 

Han har også vore med på ei rekkje folkemusikkutgjevingar, m.a. med Olav Luksengård Mjelva (Spellmannprisen 2009), Carl Petter Opsahl og Arne Anderdal. 

Saman med mangeårig kantor i Ål, Audun Flaen har han vore heilt sentral i å utvikle folkemusikkmessa på Ål til å bli ei messe som blir brukt i heile landet. Denne messa har også blitt gjeve ut på CD.

Kvarts

Folkemusikkgruppa Kvarts er den største delen av det utøvande virket til Jo Asgeir Lie. Gruppa vart etablert i 1998, og har turnert i inn-og utland sidan då. Kvarts har til no gjeve ut 12 produksjonar, og for to av dei har gruppa også vunne Spellemannprisen. I 2024 fekk dei også Folkelarmprisen. 

Kvarts har samarbeidd med ei lang rekkje musikarar, og har også hatt eit suksessfullt samarbeid med Kringkastingsorkestret. Kvartetten har også spela med Kristiansand symfoniorkester og Trondheimsolistene, og kvartetten har også hatt musikalske samarbeid med ei lang rekkje musikarar opp gjennom åra, m.a. Jonas Fjeld og Henning Kvitnes. Med Kvarts har han også vore med å skrive teatermusikk og bestillingsverk til fleire festivalar.